ស្រឹងជញ្ជក់ទឹកដោះ (Rice Bug)

១. ដំណាំជម្រក

ស្រឹងជញ្ជក់ទឹកដោះមានដំណាំជម្រកជាច្រើនក្រៅពីដំណាំស្រូវដូចជា ស្មៅអង្ករ ស្រូវព្រៃ ពោត និងស្មៅ​​ Echinochloa។

២. ជីវិតរស់នៅ និងការបំផ្លាញ

នៅពេលវាលស្រែមិនទាន់មានស្រូវ ស្រឹងពេញវ័យអាចរស់នៅលើស្មៅ និងច្រើនហើរ​មកស្រែ​នៅ​ពេល​ស្រូវបែកផ្កា។ ស្រឹងពេញវ័យធ្វើសកម្មភាពខ្លាំងនៅពេលព្រឹកព្រលឹម និងពេលព្រលប់​ប៉ុន្តែ​ស្រឹងជញ្ជក់ទឹកដោះពេញវ័យមិនត្រូវបានទាក់ទាញខ្លាំងដោយភ្លើងអំពូលឡើយ។

ពងញាស់នៅពេលព្រឹក ហើយនៅពេលញាស់កូនស្រឹងប្រមូលផ្តុំនៅជុំវិញសម្បុកប្រហែល២ ទៅ៣ម៉ោង ទើបបែកខ្ញែកឡើងលើកួរស្រូវ។ នៅពេលមានការប៉ះទង្គិច ទាំងកូនស្រឹង និងស្រឹងពេញវ័យសុទ្ធតែបញ្ចេញនូវក្លិនក្រពុល (ឆ្អេះ)ដូចសង្កើច ហើយកូនស្រឹងទម្លាក់ខ្លួនចុះដី ហើយស្រឹងពេញវ័យហើរចេញយ៉ាងលឿន។ ទាំងកូនស្រឹង និងស្រឹងពេញ​វ័យច្រើនប្រមូលផ្តុំនៅ​លើកួរស្រូវ ចុចបឺតគ្រាប់ស្រូវកំពុងចេញទឹកដោះ ដោយប្រើបំពង់មាត់ចុចតាមចន្លោះកណ្តាលនៃ​សំបកស្រូវ ធ្វើឱ្យគ្រាប់ស្រូវស្កក ឬគ្រាប់អង្ករខុសប្លែកពីធម្មតា និងងាយបាក់នៅពេលកិន។ ស្នាមចុចបឺតរបស់ស្រឹងបង្កឡើងដោយផ្សិត ហើយបន្សល់ទុកនូវស្នាមពណ៌ត្នោតលើគ្រាប់ស្រូវ។ ស្រឹងជញ្ជក់ទឹកដោះក៏អាចចុចបឺតស្លឹក និងត្រួយខ្ចីស្រូវដែរ។

៣. កត្តាជះឥទ្ធិពលដល់បរិមាណស្រឹងលើវាលស្រែ

• កត្តាអាកាសធាតុៈ សីតុណ្ហភាពពី២៧ ដល់២៩អង្សាសេ និងសំណើមពី៨០ ទៅ៨៥ភាគរយ​គឺសមស្របសម្រាប់ស្រឹងជញ្ជក់ទឹកដោះ។ មេឃស្រទុំ ភ្លៀងរលឹម និងមិនសូវមាន​ខ្យល់​គឺសម​ស្រប​សម្រាប់ការលូតលាស់របស់ស្រឹង។
• សត្រូវធម្មជាតិៈ ពពួកឃ្មុំនៃសណ្តាន Scelionidae ច្រើនប៉ារ៉ាស៊ីតលើពងស្រឹង។ ពពួក​ពីងពាង​ចាប់កូនស្រឹង និងស្រឹងពេញវ័យជាចំណីអាហារ។ ចង្រិត កណ្តុរ និងកណ្តូបអង់តែនវែង ស៊ីពងស្រឹងជាអាហារ។ ផ្សិត Beauveria bassiana បង្កជម្ងឺដល់កូនស្រឹង និងស្រឹងពេញវ័យ។

៤. វិធីសាស្រ្តទប់ស្កាត់ និងកម្ចាត់

• ធ្វើអនាម័យស្រែ ដោយសម្អាតជម្រករបស់ស្រឹង
• ប្រើស្បៃមុងអូសប្រមូលស្រឹងយកមកបុកលាយទឹក ហើយបាញ់ទៅក្នុងស្រែដើម្បីប្រដេញស្រឹងចេញពីស្រែវិញ
• ថែរក្សាសត្វមានប្រយោជន៍ ដោយកាត់បន្ថយការប្រើថ្នាំពុលគីមីដែលមានកម្រិតពុលខ្លាំង
• ប្រើថ្នាំពុលផ្សំពីរុក្ខជាតិ

រៀបរៀងដោយៈ

១. លោកសាស្រ្តាចារ្យបណ្ឌិត ជាង ហុង សាកលវិទ្យាល័យភូមិន្ទកសិកម្ម

២. លោក ងិន ឆាយ នាយកដ្ឋានដំណាំស្រូវ នៃអគ្គនាយកដ្ឋានកសិកម្ម

ដកស្រង់(ដោយសង្ខេប)ចេញពីៈ

សៀវភៅសត្វចង្រៃបំផ្លាញដំណាំសំខាន់ៗនៅកម្ពុជា (បណ្ណាល័យអគ្គនាយកដ្ឋានកសិកម្ម)