បច្ចេកទេសចិញ្ចឹមក្តាមនៅក្នុងអាងស៊ីម៉ង់តិ៍

 

ក្ដាមស្រែ គឺជាអាហារដ៏ពេញនិយមបំផុត គេអាចយកទៅច្នៃធ្វើជាម្ហូបបានច្រើនប្រភេទដូចជា ស្លម្ជូរ ឆា ភ្លា ក្ដាមប្រៃ -ល-​​ ឱមានជារសឆ្ងាញ់ពិសា​ ក៏ប៉ុន្តែនៅក្នុងប្រទេសកម្ពុជា​​យើង មុខរបរចិញ្ចឹមក្ដាម​ហាក់បីដូចជា​មិន​សូវ​​មានកសិករណាចាប់អារម្មណ៏នៅក្នុងការចិញ្ចឹម ភាគតិចណាស់ដែលកសិករយើងយល់ដឹង​ពីបច្ចេកទេស​ចិញ្ចឹម​ក្ដាម និងតម្លៃទីផ្សាររបស់វា។

ការចិញ្ចឹមក្ដាមគ្មានអ្វីលំបាកនោះ អាចធ្វើបានច្រើនវិធី អាស្រ័យទៅលើការចូលចិត្ត​ ដោយយើង​មិនចាំ​បាច់​ត្រូវ​មាន​ដីធំ ឬក៏ថវិកាច្រើននោះទេគឺយើងអាចចិញ្ចឹមវាបាននៅក្នុងអាងស៊ីម៉ង់តិ៍ ហើយពូជរបស់វា​ទៀត​សោតគឺ​រឹតតែស្រួលរក។ ដើម្បីចង់ដឹងថាការចិញ្ចឹមបែបណានោះយើងនិងបង្ហាញពីវិធីសាស្រ្ដ ដូចខាងក្រោម៖

១/. ការរៀបចំអាងចិញ្ចឹម

- អាងស៊ីម៉ង់តិ៍ 4ជ្រុង ប្រវែង 2 x 3 ម៉ែត្រ កម្ពស់ 1ម៉ែត្រ -យកបំពង់ទុយោ pvc ចំនួន 2 មកដាក់សំរាប់​បញ្ចេញ​​ និងបញ្ចូលទឹក 

- ​អាងថ្មីត្រូវត្រាំទឹកទុកចោល ហើយប្តូរទឹក 3-4ដង

- យកដើមចេកមកដាក់ក្នុងអាងដើម្បីកាត់បន្ថយជាតិកំបោរ

- ដាក់ដីប្រមាណកម្រាស់ 2 ទៅ 3តឹក

- ធ្វើដំបូលអាង ដើម្បីជាម្លប់ ដាក់បំពង់ទុយោ ផែនក្បឿងចាស់ៗជាជម្រករបស់វា ហើយគួរដាំស្រូវ ត្រកួន​នឹង​ស្មៅ ចក សារាយ រួចដាក់ទឹកចូលកំពស់ប្រមាន 3 តឹក។

២/. ការដាក់ចិញ្ចឹម និងថែទាំ

- ព្រលែងក្តាមដែលចាប់មកពីបឹងធម្មជាតិ ដែលមានសុខភាពល្អ ប្រហែល 50ក្បាល

- ឈ្មោល 25 មេ 25 ដាក់ចូលក្នុងអាង

- មួយអាទិត្យផ្តល់ចំណី 3 ដង

- ចំណីមានដូចជាបាយ កូនត្រីល្អិត កំពិស ស្ពៃ ត្រកួន

 - គួរដាក់ចំណីឱ្យសមល្មម កុំឱ្យច្រើនហួសពីតម្រូវការ ព្រោះអាចធ្វើឱ្យអាងស្អុយ ដូចនេះ គួរយកចេញ​វិញ​បើនៅសល់

- ប្តូរទឹក 2-3 ដងក្នុងមួយខែ។

- បើយកកូនក្តាមតូចៗដែលមានអាយុ 15 ថ្ងៃ ដំបូង គួររកដង្កូវក្រហម ឬក៏ពងមាន់ស្ងោរយក​ពងក្រហមជា​ចំណី​ ក្រោយពីនោះ រកកូនត្រីកំពិសមកចិញ្ច្រាំឱ្យវាស៊ី ឬក៏ចំណីត្រីអណ្តែង

-អាយុបាន 30ថ្ងៃ សឹមយកមកព្រលែង ផ្ទៃអាង ១ម៉ែត្រការ៉េ អាចព្រលែងបាន ១ម៉ឺនក្បាល

៣/. ការប្រមូលផល

-ក្តាមនឹងសក ពី 13-15 ដង ទើបល្មមជាក្តាមពេញវ័យអាចយកទៅលក់បាន

-នៅរដូវភ្លៀង មេក្តាម 1 ក្បាលមានពងប្រមាណ 500-700 ពងក្តាមធំធាត់រយៈពេល ពី 6-8 ខែ។

 ៤/. ការសកសំបក

- ក្តាមដែលសកសំបកសង្កេតបាននៅពេលដែលស្នាមឆ្នូតខាងចុងនៃសំបកខ្នងឃ្លាតគ្នាខុសប្រក្រតី

- សំបកក្តាមនឹងនៅស្ងៀម ហើយទាញជើងចេញក្រៅទាំងសងខាង

- ស្នាមទ្រនុងខ្នងនឹងរបើកចេញ

- ជើងគូរខាងក្រោយរបស់វា ក៏របើកចេញមកមុន។

កសិករទាំងអស់គ្នាគួរតែសាកល្បងចិញ្ចឹមក្ដាមទាំងអស់គ្នា ពីព្រោះវាងាយស្រួលក្នុងការចិញ្ចឹម មិន​ទាម​ទារ​ដើម​​ទុនច្រើន ហើយថែមទាំងមិនពិបាករកទីផ្សារទៀតផង ពីព្រោះក្ដាមគេហូបមិនទាមទាររដូវទេ ៕